దేశం లోనే గొప్ప ఆలయం ఇదేనేమో..?

     ఎంతో విశాల దృక్పధానికి ఆలవాలమైన ఈ ఆలయం ని దర్శించుకున్న వాళ్ళేవరన్నా ఉంటే వారి కాళ్ళు మ్రొక్కాలని వుంది.
ఇంతకీ ఇదేం ఆలయమో ఎవరైనా చెబుతారా?? 

గుర్తుపట్టారా?

??

???

???

????

?????
ఇది దేవాలయం అనుకుంటే అడుసు తొక్కినట్లే.. అంతకన్న పవిత్రమైనదే మరి..??

.....
.....

......


....

....

.........

ఇది ఒక ముద్రణాలయం...

*************
******************
***********************
*****************************
***********************
******************
*************








        భారతీయత.. భారతదేశ ఆధ్యాత్మిక కేంద్రంగా భాసిల్లుతూ... కేవలం భారతీయ సంస్కృతి పరిరక్షణ కోసం స్థాపించబడి 92 ఏళ్ళు గా అవిరళ కృషి చేస్తున్న ధార్మిక సంస్థ గీతా ప్రెస్. ప్రపంచంలో అత్యధికంగా హిందూ సంబంధమైన పుస్తకాలు అనేక భాషల్లో అతి తక్కువ ధరకే అందిస్తున్న సంస్థ ఇది. నిజంగా దేవాలయాన్ని తలపిస్తున్న ఈ గీతా ప్రెస్ 1923 ఏప్రియల్ 29 న జయదయాళ్ గోయంక ఉత్తర్ ప్రదేశ్ లోని గోరఖ్ పూర్ లో స్థాపించారు. వీరి ఆధ్వర్యంలో గీతాప్రెస్, గోవిందభవన్ ,  గీతా భవన్, వేదపాఠశాల, ఆయుర్వేదిక్ ఔషదాలయ  సేవాదళ్ వంటి సంస్థలు ద్వారా అనేక ప్రాంతాలలో   హిందూ సంస్కృతికి కృషిచేస్తూ.. సనాతన ధర్మాల ఉనికిని కాపాడుతున్నారు. గీతా ప్రెస్ నుంచి పలు భాషల్లో వస్తున్న 'కళ్యాణ్ ' అనే పత్రికకు లైఫ్ టైం ఎడిటర్ గా తొలి ఎడిటర్ హనుమాన్ ప్రసాద్ పొద్దార్ గారి పేరే కొనసాగుతుంది. శ్రీమద్భగవద్గీత, రామాయణం, దుర్గా సప్తసతి, పురాణ , ఉపనిషత్తుల వంటి పుస్తకాలు ఇప్పటి వరకూ 370 మిలియన్ కాపీలను ఈ సంస్థ ప్రచురించింది. అయినా సరైన గుర్తింపుకు నోచుకోక పోవడం దురదృష్టం కదా..//

నమోస్తు గీతా ప్రెస్
నమోనమ: గీతాప్రెస్
నిత్య సేవికా వందనం
నిరంతర శ్రామికాభివందనం

               - కరణం కళ్యాణ్ కృష్ణ కుమార్
                           26.02.2015

స్వరములు ఏడు.. మరి....రాగాలెన్నో తెలుసా..?

స్వరములు ఏడు.. మరి....రాగాలెన్నో తెలుసా..? 

                                               - - కరణం కళ్యాణ్ కృష్ణ కుమార్
                                                                         24.02.2015 

అవి చతుర్వింశతి రాగాలు .. అంటే  24  అన్నమాట. అవికూడా స్త్రీ రాగాలు

1. బిలహరి రాగము    

2. భాండి రాగము
3. హితదో రాగము
4. భల్లాతి రాగము
5. దేశి రాగము    
6. లలిత రాగము
7. వరాళి రాగము
8. గౌళ రాగము
9. ఘూర్జర రాగము
10. జౌళి రాగము
11. కళ్యాణి రాగము

12. అహిరి రాగము

 

13. సావేరి రాగము
14. దేవక్రియ రాగము
15. మేఘరంజి రాగము
16. కురంజి రాగము
17. మళహరి రాగము
18. కాంభోజి రాగము
19. నాహుళి రాగము
20. ముఖారి రాగము
21. రామక్రియ రాగము
22. గండక్రియ రాగము
23. ఘంటారవ  రాగము
24. శంకరాభరణ రాగము

         ఇన్ని రాగాల్లో నాకు మాత్రం ఒక్క రాగమూ రాదు .. నాకొచ్చిన రాగం వీటిలో లేదు .. ఏంచెయ్యలి చెప్మా..? అది ఏమి రాగమో చెప్మా..? అన్నట్లు ఇవన్నీ స్త్రీ రాగాలైతే పురషరాగాలేవిటి?? ఏవిటో అప్పట్లో అంతా పురుషాహంకారులన్నారు గానీ వాళ్ళూ స్త్రీ పక్షపాతులేనండోయ్..

ఒకరెంట మరొకరు

//ఒకరెంట మరొకరు//

                                                                    - కరణం కళ్యాణ్ కృష్ణ కుమార్
                                                                   19.02.2015





పోండి..అందరూ వెళ్ళిపోండి.
మమ్మల్ని ఏకాకుల్ని చేసి..
మా అంతరాల్ని మీ రూపంతో నింపేసి

మీరు గీసిన గీతల్లో
మీరు వ్రాసిన మాటల్లో
మీరు తీసిన చిత్రాల్లో
మిమ్మల్ని చూసుకోమంటూ..
ఒక్కొక్కరుగా వెళ్ళిపోండి..

మీభావాల రెక్కలేరుకుని
సిగన పెట్టుకుంటాం
పుస్తకాల నడుమ నెమలీక బదులో
మనసులో ప్రేమమూర్తి బదులో
మది దేవళంలో దేవతల బదులో
మిమ్ము పదిలంగా దాచుకుంటాం..

నిత్యం అభిమానపు పూలు
మాలగ జేసి అర్చించుకుంటాం..

మీరు లేరన్నది ఒట్టి భౌతికం..
మీ జ్ఞాపకం శాశ్వతం..

మీరు ఆకాశాన నిత్యం మెరిసే
నక్షత్రం..
ఒకరినొదిలి ఉండలేక
మరొకరు..
వరుసగా
ఒక్కొక్కరుగా..!!!

 

(మనసు భారమౌతోంది.. బాలచందర్ , అక్కినేని, దగ్గుబాటి సినీదిగ్గజాలు. బాపు..రాగతిపండరి వంటి ఉద్దండ కార్టూనిస్టులు.. . అందరూ ఒకరెంట మరొకరుగా... అడుగులోన అడుగేసుకుంటూ...కన్నీళ్ళు మిగిల్చి)

ఎవడు కనిపెట్టేడో గానీ..???

// ఎవడు కనిపెట్టేడో గానీ..???//

                              - కరణం కళ్యాణ్ కృష్ణకుమార్
                                                     19.10.2014

                    

               కమ్మగా ఎర్రెర్రని ఆవకాయకి , కాస్త పప్పొడి కలిపి, చారెడు నెయ్యి అద్ది, పెద్దపెద్ద ముద్దలు చేతిలో పెడుతున్న అమ్మమ్మ గుర్తొంచిందీ రోజు... !

            అసలు ఆ ముద్ద మహత్తో.. అమ్మమ్మ చేతి చలవో... ఆవకాయలో ని రుచి మహిమో గానీ.. ఆ ముద్ద రుచి నాలికకు తగిలిన వాడు జన్మలో మరిచిపోలేడు.. ఇది మాత్రం సత్యం.. సాంబ  డైరీ లో రాసుకున్నా రాసుకోకపోయినా ఇది 100 శాతం వాస్తవం.                 దీనిపై కాస్త ..మరికాస్త.. మరింత లోతుగా ఆలోచిస్తుంటే.. అసలు ఆవకాయలోనే ఆ మహిమ ఉన్నదనిన్ని.. దానికి అమ్మమ్మ ప్రేమ, తిరుపతి లడ్డంత అందమైన ముద్ద మధురంగా మారాయని తెలుస్తోంది. ఘాటుకి కన్నీళ్ళు కారుతూ... సుస్..సుస్.. అంటూ .. తింటూ లొట్టలేసుకుంటూ.. ముద్ద కోసం పోటీపడి కొట్టుకుంటూ, వారేవా ! ఆ రోజులే వేరు కదూ.. పాపం పసివారు.. ఈ రోజుల్లో పిల్లలకి ఇలాంటివి ఒకటుంటాయని తెలీదు.. కొన్ని రోజులైతే ఊహకూడా ఉండదు.. అతనెవరో ఫారెనరు... పూరీలోకి గాలి ఎలా పంపారబ్బా ఇండియన్స్ అని సోచాయించాడంట// మన పిల్లలూ అలా కొన్నాళ్లకు తయారవుతారని .. మన మోత బరువు పుస్తకాలే శెలవిస్తున్నాయ్ అనుకోండి.

  ఇంతకీ ఇదంతా ఇప్పుడెందుకనేగదా మీఫేసు ఫీలింగ్.. అక్కడికే కమింగు..

ఎన్నో ఏండ్లు గతించి పోయినవి గానీ.. అల ఆవకాయ చేసిన వారెవరో తెలియక పాయనే..!

ఎంచక్క ముక్కలు కొట్టి.. ఆవపిండి తయారు చేసి, కారం వేసి.. అబ్బబ్బ చేసేటప్పుడే ఒళ్ళు పులకరించిపోతుందంటే.. ఆహా ఏమిరుచి.. తినరామైమరచి.. రోజూతిన్నా కానీ మోజే తీరనిది అన్న పాట గుర్తొస్తుందనుకోండి..

రెండు నుంచి వారం రోజుల్లో కుళ్ళిపోయి, పాడైపోయి, దేనికీ పనికి రాకుండా పోయే మామిడి లేదా ఇతరాలు, ఏదైనా ఏళ్ళతరబడి పాడైపోకుండా ఉండటానికి ఎన్నిరకాల ప్రయోగాలు చేశారో.. ఎంతమంది మృత్యువాతపడ్డారో.. అని అనిపిస్తుంటుంది ఒకోసారి...

       మనకు బుద్ధి పుట్టినప్పటి నుంచీ చూస్తున్నాం.. ఏ ఫారెన్ ఐటం అయినా... నెల రోజుల మించి స్టాక్ ఉంటుందా...???

          అంటే నిన్న వచ్చిన హుద్ హుద్ లాంటి ప్రకృతి వైపరీత్యాలూ... ఇంటిల్లిపాదీ పనీ పాట చేసుకోని బ్రతకడాలు వంటి ఎన్నో రకాల సమస్యలను ఎదుర్కొనేందుకు మన భారతీయ పాకశాస్త్ర ప్రావీణ్యులు కనిపెట్టిన స్టాక్ ఫుడ్ లాంటివి ఇంతవరకూ ఎవ్వరూ కనిపెట్టలేదనే నాకనిపిస్తోంది..!  మనకు తెలియని వెక్కడన్నా ఉన్నాయేమో గానీ , విన్నంతవరకూ అదీ పరిస్థితి..

ఆ తర్వాత అనేకరకాల ఆవకాయలు చేశారనుకోండీ, మన ఇంటి దేవతలు..
    ప్రయోగాలకు పుట్టినిల్లు వంటిల్లేనని ఇదే ఋజువుచేస్తోంది మరి.. కాదని అనగలరా..!

     ఎన్నో వందల సంవత్సరాల క్రితమే ఆవకాయ కనుక్కున్న ఆ మహానుభావుడో, మహానుభావురాలో ఎవరైతే వారికి ఒక్క నమస్కారం పెట్టుకుని .. ఎంచక్కా ఆవకాయ లాగించేయండోయ్..ఈ మధ్య అదేదో వచ్చింది... లేటెస్ట్ ఆవకాయ్ బిర్యానీ ట..! ఆదివారం వారు అదీ కూడా లాగించి..

ఆవకాయ టేస్ట్ ను వేస్ట్ ఫెలోస్ కి చెప్పి, పేస్ట్ మొఖాలూ ఇది ఇండియన్ బెస్ట్ అనిన్ని.. అసలు వరల్డ్ ఫస్ట్ అనిన్ని ప్రచారం చేయండి.. పేటెంటుకి ఏ విదేశీ సంస్థో పోటీ పడుతుందేమో ఓ కన్నేసుంచండి...! 

అదండి సంగతి.!  సందట్లో సడేమియాగా మీరూ ఎంచక్క ఉత్తపప్పు.. అదే సుద్ధ పప్పు లో నో.. కందిపచ్చడిలోనో పప్పొడిలోనో , ఆవకాయ కలుపుకుని, నెయ్యేసుకుని  కమ్మగా ముద్దలు లాగించేయండే..!

నిను వర్ణింప తరమా..!

నిను వర్ణింప  తరమా..!

                             - కరణం కళ్యాణ్ కృష్ణ కుమార్
                                                  14.2.2015

అల చల్లనిగోదారి  అలలపై
ఇల  నావయ్యారిభామ తో
నడిరేయి నావ పై విహరించగ..,
మెల మెల్లగ కదిలే లహరి తరగలపై
మిల మిల  మెరిసే
వేవేల  చంద్రాబింబాల నడుమ

తెల తెల్లని చీరె కట్టి,
మరు మల్లియలు సిగను చుట్టి..
చల చల్లని గాలికి ఎగిరే ముంగురులతో..
ధగ ధగ ధవళ కాంతులీను..
నా కన్నులకలికి  సౌందర్యం కాంచి..

తిమిరమున
వేవేల నక్షత్రాల నడుమ..
కౌముది కౌగిట మురిసేటి  ఆ హిమసఖుడు
మరుచంద్రుడుదయించెనని భ్రమించెనో..
ఉషోదయమాసన్నమైనదని భ్రాంతి నొందెనో

నా ప్రణయిని చూసి ఉలిక్కి పడి
వడి వడిగ మేఘాల మాటున నక్కెనే.. 
ఓ నీరజారీ.!  నీ నవ్వులకు
ఆ తొగచెలికాడు తొందరపడి  తొలగిపోయెనే!

ఓ చెలి ,నా సహచరి ..!
నీ సౌందర్యం ఏమని వర్ణింతునే..!!

 

(లహరి = అల ,  ధవళ కాంతి = తెల్లని వెలుతురు,   కౌముది = వెన్నెల,
 కన్నుల కలికి=నీరజారి= ప్రణయిని= సహచరి = చెలి,  తొగ చెలికాడు = హిమసఖుడు = చంద్రుడు , తిమిరము = రాతిరి= చీకటి)

                   

గణణక్కాయ్.....వేడి పొయ్యి (సరదాకి..)

 సరదాకి....

// గణణక్కాయ్.....వేడి పొయ్యి.//
                         కరణం కళ్యాణ్ కృష్ణ కుమార్
                                      14.02.2015                   






“సంస్కారవంతమైన నమస్కారానికి ప్రతి నమస్కారం మన సంస్కారం ..
మస్కా నమస్కారాలకి తిరస్కారం మన ప్రధమ కర్తవ్యం..”

ఇంతకీ ఇంత గొప్పదైన ఈ మాట చెప్పిందెవరా అని అలోచిస్తున్నారేటీ.. వద్దు.. మీ బుర్రకి పదునెట్టొద్దద్దు..ఎవరన్నరో నేను చెప్పేలోపు ఒక చిన్న బ్రేక్ తీసుకుందాం.. చిటికెలో వచ్చేద్దాం..  చిటికన్నా.. ...చిటికిన వ్రేలని చెప్పొచ్చుగా అని ఓ లోలోన తిట్టుకుంటున్నార్లేండీ.. నాకు తెలుసులే..!

   చీటికి మాటికీ నన్నాడిపోసుకోవడం తప్ప వేరేపన్లేదు మీకు... ఆయ్.. చిటికో,  ఛిటీకిన వేలో ఏదోటి ..మళ్ళొస్తానన్నగందా..!
గందా.. అంతే హింది గందా కాదు నాయనా.. కదా అని.. మళ్ళీవస్తానన్న కదా..!

 ఆ వచ్చే వచ్చే.. ఓపికపట్టు..   

  ఒకే బ్యాక్ నుంచి పెవిలియన్ కి.. వెల్ కం టూ తెలివైనోడు..

  సరే మనం  "సంస్కారవంతమైన నమస్కారానికి ప్రతి నమస్కారం మన సంస్కారం
మస్కా నమస్కారానికి తిరస్కారం మన ప్రధమ కర్తవ్యం" అని  ఎవరన్నారో తెలుసుకునే ముందు...

అసలు పెవిలియన్ అనే పదం ఎక్కడవాడతారో తెలుస్సా..

అరె.. ఎంతబాగా గంగిరెద్దల్లే తలూపాడో హహహ ఎ..క్క..డా??.

క్రికెట్ లో..

వా.. వా. ఏంసెప్తిరి ఏం సెప్తిరి..!!

క్రికెట్ కు మూలం ఏ ఆటో తెలుస్సా..??
ఆ..ఆ..ఆ
అర్రె అర్రె మళ్లీ ఊపాడితను బుర్రే.. బుర్ర

హబ్బ..హబ్బ ఏం ఊపారండి.. మళ్ళీ మీరు తలూపేస్తుంటే.. క్యాష్ కరిపోద్దని కంగారౌద్ది నాకు .. హహహ

కోడుం బిళ్ళా..

సెబ్భాష్.. మీకు చాలా తెలుసు..  దానే బిళ్ళంకోడు అంటారు ఆంధ్రోళ్ళు..

హహహ

సరే మరి అసలు ప్రశ్న దగ్గరికొచ్చేద్దాం...

  సరే మనం  “సంస్కారవంతమైన నమస్కారానికి ప్రతి నమస్కారం మన సంస్కారం
మస్కా నమస్కారానికి తిరస్కారం మన ప్రధమ కర్తవ్యం” అని ఎవరన్నారో తెలుసుకుందామా.. ?

గణణక్కాయ్...

ఓ గణనక్కయ్.. నీ తాన నక్కిపెట్టిన సమాధానాలు నాలిగిచ్చుకో
గిచ్చుకో అంటే.. గిచ్చి ..సంపి పారేయమని కాదు గణణక్కయ్..

సమాధానాలు ఇచ్చుకో..

వాకే

A. కె                        B. కెకె
C. కెకెకె                    D. కెకెకెకె

పది రూపాయల ప్రశ్న..

పంది కాదు బాబూ.. కంగారు పడొద్దు.. హహహ
నీ కంగారు సూత్తే నాకు కంగారౌద్ది..

పది రూపాయల ప్రశ్న..
ప్రశ్న అర్ధమైంది కదూ..

"  సంస్కారవంతమైన నమస్కారానికి ప్రతి నమస్కారం మన సంస్కారం
మస్కా నమస్కారానికి తిరస్కారం మన ప్రధమ కర్తవ్యం” ఎవరన్నారు?

సమాధానం తెలుసా.. మీకు తెలుసు.. అదిగో ఊపుతున్నారు.. ఊపేస్తున్నారు..  ఊపేశారు..
అరె అరె అరె మళ్లీ ఊపేశారు.. ఆడియన్స్ పెద్దగా తప్పెట్ట్లు

ఒక్క నిమిషం.. తప్పెట్లు కొట్టే ముందు చిన్న బ్రేక్ తీసుకుందాం.. చీటిఖేసి వచ్చేద్దాం..

సారు... నాకూ చిటికినేలు పిలుత్తాంది...

అరె మీరూ నాలాగే..!! షుగరేమన్న ఉందా..?

సారూ చిటికినేలు సూపించాగందా.. ?

సరే ఆడియన్స్ సూత్తూ ఉండండి.. చిటికేసొచ్చేత్తాం...
మీలో ఎవర్రన్న ఛిటికేయాలన్నా.. చిటికిలో పూర్తిసేసి వచ్చేయండి..

వెల్ కం టూ పెవిలియన్

హహహ
ప్రశ్నకు సమాధానం  తెలుసుకుందామా..?

చెప్పండి మీ పదిరూపాయల ప్రశ్నకు సమాధానం..చెప్పండి

బి..
కెకె
కాదుకాదు.. అవునేమో
డి.. అవుననుకుంటా. కానీ కాదు
ఎ.. మోస్ట్లీ అయ్యే ప్రమాదం ఉంది
సి.. అయ్యే చానెస్స్ కొద్దిగా ఉన్నయ్..

వీడేంటీ అన్నీ సమాధానాలు చెప్తున్నాడు..

మీరు ఒకే సమాధానం చెప్పాలండీ..!  మీరు అన్నీ చెప్పేసి క్యాష్ పట్టూకెళ్తే.. నెక్స్ట్ వాళ్ళకి నేను చిప్ప ఇవ్వాల్సుంటుంది.. ఆ

"బి"

ఫైనలా?
కం ఫం..??
లాక్ చెయ్యనా..??
గణణక్కాయ్.. లాక్ చెయ్..!

బ్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్ర్

అయ్యో ఈ రోజు గణణక్కాయ్ టైం అయిపోయింది..
సమాధానం మీకు తెలిస్తే సెప్పండి.. పొయ్యి పైన కూర్సోండీ.. మీరు సెయ్యాల్సిందళ్ళా.. కామెంట్ పెట్టడమే.. సమాధానం  తెలిసిన అచ్చంగా తెలుగు వారు కామెంట్ పెట్టొచ్చు.. పొయ్యి ఎక్కొచ్చు.. కమాన్

ప్రేమికుల 'దినం.. పెట్టిన' రోజు శుభాకాంక్షలు.. లవ్యూ ఆల్.!!!

అందాల నా బుల్లి

ద్విపదను పోలినట్లుండే నేను వ్రాసిన కవిత - మీ కరణం

// అందాల నా బుల్లి //

                   - కరణం కళ్యాణ్ కృష్ణ కుమార్
                            03.11.2014

కలలోన నా రాణి కవ్వంచినదోయి
కనుదోయితో నవ్విసిరి బంధీని జేసి

మందాన లిప్ స్టిక్కు మూతంత రాసింది.
కంటి కాటుక, పులిమి దిష్టిచుక్కేలె అంది

మిలమిలా మెరిసి మతిపోగొట్టింది
కిలకిలా నవ్వేసి గుండె కోసేసింది

మందారమై వచ్చి మేను పై వాలింది
మకరందాల ముద్దు..మురిపాలొలికింది

చిన్న చిన్న గ ఆక్రమించే స్తోంది నన్ను
చుట్టు చూస్తారంటు చిలిపిగ నేనాపేను ..

కాదు కుదరదంటు మూతి ముడిచేసింది
లేదు మాటాడనంటు బుంగమూతెట్టింది..

బుల్లంటె నాకెంత.. పానమో తెలుసాంటు..
గారాలు నేపోతు.. కాళ్ళనే పట్టాను

కిట్టున్నే తన్నాను ..తిట్టులే తిట్టాను
ఒట్టేసి చెబుతున్న..శివంగి నేనంటు

చిందులే వేసింది చిత్తడిగ ఉతికేసింది
సర్రునా వాలుజడ విరిసి కొట్టేసింది

కెవ్వుమని అరిచానో..కళ్ళు కలిపేసింది
కన్నీటి వరదై ..కుమిలిపోయింది

నేనంటే ఎంత..పానమో బుల్లికి
నేనంటే ఎంత..ధ్యానమో సిరికి

మల్లెలే తురిమింది.. కొంగు ఎగదోసింది
చిలిపిగా చూస్తూనె..పైపెదవి కొరికింది

పానాలె పోయేను..గుండెలే అదిరేను
అందాన్ని చూడంటు..మనసు మెలిపెట్టేను.

ఏమందమోగా తనది..ఎక్కడా లేనిది
ప్రకృతినే తెచ్చి..పైటగా చుట్టింది..

జూకాలు కదిపింది..దండ నే కొరికింది
అరికాలు రుద్దుతూ..అల్లరే చేసింది

గుండెపై కాలుంచి గజ్జె ఘల్లనిపించె
ఒళ్ళంతా ఝల్లుమన మేను మైకము క్రమ్మె

చూడనట్టుగ నేను..చూపులతో కమ్మేను
కొంటె చూపులు చూస్తు..కొంకర్లే పోయేను..

చేతిలోని చెండు విసిరి వేసేసింది..
చిందినా పూలతో..వడలు మత్తెక్కింది

వగలు చూపుతు బుల్లి, సెగలు పోతూవుంది
విరులు నలుపుతు బుల్లి ,మరులు కురిపించింది

ఇంతలోనే మబ్బు, నల్ల పైట కప్పింది
చంద్రాన్ని చుట్టేసి మెల్లగా దాచింది

ఎగసి పడుతున్న ఎదలు..సొగసు కాంతులు జల్లె
ఒడసి పట్టెను నన్ను..నుదుట పట్టెను చెమట

ముంగిటే చేరింది..ముద్దులే ఇచ్చింది
మత్తు చూపులతో..కన్ను ఎగరేసింది.

మందారమై వచ్చింది..ముద్దగా మురిసింది
అందెలే కదిపింది..అందాలు చూపింది

కిల కిలా నవ్వుల్ని, రువ్వుతూ నాబుల్లి
మెల్ల మెల్లగ అగ్గి భగ్గుమని రాజేసింది

జారి పోయెను గుండె మూగ బోయెను గొంతు
వడి వడిగ నను చేరి, పడి పడి నవ్వె నాసిరి

మెల్లగా చేరింది, మేను పెనవేసింది
మత్తుగా చూస్తూనె ,ఒడిలోన ఒదిగింది

సప్త సాగర ఘోష మెత్తగా వినిపించ
ఝాము మొత్తము గోము సద్దు చేసె

వగల మారి బుల్లి, దిగులన్నది మరచి
ఆక్రమించె నన్ను.. అతిక్రమించె మిన్ను

చిన్న చిన్నగ గాలి, చల్లగా వీచేను
చిన్న చిన్నగ చినుకు నేలనే రాలేను

మట్టి వాసన తోటి మల్లె వాసన చేరె
గమ్మత్తుగ మత్తులో ప్రాణ మూగిసలాడె

అంతలోనే వచ్చె మెలుకువ, కాకుల కువకవతో
ఎటుపోయెనో నా బుల్లి ,ఎటుపోయెనో నా సిరిమల్లి..!!

(చిత్రం గుగూల్ సహకారం... ఆర్టిస్ట్ NB గారని ఉంది.. .. వారికి హృదయపూర్వక కృతజ్ఞతలతో...)
 @ COPY RIGHTS RESERVED)

కన్నీరు కురిసిన రాత్రి

// కన్నీరు కురిసిన రాత్రి //

                                - కరణం కళ్యాణ్ కృష్ణ కుమార్
                                                      30.01.2015

నిశ్చేష్ట నిశిలో
గాలి నిలిచిన వేళలో
నాలుగు గోడలు సాక్షిగా
నిన్ను నీవే ప్రశ్నించుకుంటూ
లోలోన దహించుకుంటూ
క్షణికావేశంలో.. కలతలో
ఏంచేస్తున్నావో తెలుస్తోందా..??
ఒంటరిగా..?  ఓ రాక్షసిలా..?
నీ పిచ్చి చేష్టకి విస్తుపోతూ..
నీ ఏకాంతమందిరం మూగగా రోదిస్తోంది
వెక్కి వెక్కి..కుమిలి కుమిలి..

జీవకణం జార్చిన , నాన్న..
పిండం పదినెల్లు మోసి కన్న అమ్మ
నీతోడై నడచిన  తోబుట్టువులు
నీడల్లె వెన్నంటే నీ హితుల్ బాంధవుల్
వీరెవ్వరూ  గుర్తులేరా..??
చిన్నవేదనకి లొంగిపోతే
నీవాళ్లకి ఏమిస్తావు సుమ్మీ
కడివెడు కన్నీళ్ళు తప్ప

ఎందుకంత ఆత్రం,ఆరాటం
ప్రాణంపై ఎందుకంత అసహ్యం
బ్రతకమనే భగవంతుడు
భూమి పై వదిలాడు తెలుసుకో
ఆ బ్రతుకే భారమైతే నీవారితో పంచుకో
గుండెలో దాచుకుని ఆవేశపడితే
నీదంటూ ఏమి మిగలదు సుమ్మీ
గుప్పెడు బూడిద తప్ప..

పువ్వు పువ్వుని చిదిమేస్తుందా?
కాయ కాయను రాలుస్తుందా..?
కట్టె తనని తాను దహించుకుంటుందా?
నీ కిలకిలలతో ముచ్చటపడ్డ తల్లిదండ్రులకి
కంటతడి పెట్టిస్తే ఏం ఒరుగుతుందోయ్ నీకు?
పంచుకుంటే తగ్గే భారం కోసం
చెప్పుకుంటే తీరే కష్టం కోసం
నీవాళ్ళు ఎందుకు లేరనుకుంటావ్??
చెట్టుకి కాయ భారమా నేస్తం??
బాధకు మందే స్వహత్యై తే
భవిత ఉండదు సుమ్మీ
స్మశానాల్లో సమాధులు తప్ప

ఒక్కక్షణం ఆలోచించుకో.. నేస్తం..!
బాధా పంజరం వీడితే
బ్రతుకు స్వేచ్చా విహంగం
చిమ్మచీకటి కమ్ముకొస్తే
వేకువ వెన్నంటి లేదా..?
ఎండిన పచ్చని చెట్టు
మళ్ళీ చిగురించటంలేదా..?
గ్రహణం మింగిన చంద్రం
వెలుగు చిమ్మటంలేదా?
అగ్నికి శకటం ఆహుతవుతోందని
పయనించక నిలిచామా ఎప్పుడైనా?
అనంతంలో ..
ఆ ఏకాంతం లో ఏం సాధిస్తావ్
కష్టాలకే కన్నుమూస్తే
జాతి ఉండదు సుమ్మీ
శవాల గుట్టలు తప్ప

పుట్టిందెందుకో తెలుసుకున్నావా ఎపుడైనా..
మరి మరణానికి చేరువెందుకోయ్,ఆపు ఇకనైనా..?
పుట్టినోడు గిట్టక తప్పదన్నోడు,
ప్రపంచానికి చేశాడు ఎంతో కొంతైనా.!
ఎవరూ ఏంచెయ్యలేదనే  నువ్వు
పుట్టి  ఏం సాధించావో చెప్పు ఇప్పుడైనా..??

అయినా ఆవేశానికే మొగ్గు చూపావా..?
ఇక చెప్పుకోను ఏముంటుంది నీ గొప్ప..!
ఓ చేదు జ్ఞాపంకంగా మిగలటం తప్ప..!!

             

(ఆత్మహత్య మహాపాపం అంటున్నాయి ప్రభోధ గ్రంధాలు.. నేరం అంటున్నాయి చట్టాలు.. అనవసర ఆవేశంతో జీవితాన్ని అర్ధాంతరంగా ముగించాలనుకునే వారు ఒక్కసారి ఆలోచించండి ప్రతి సమస్యకూ పరిష్కారం ఉంటుంది.. చావు మాత్రమే పరిష్కారం కాదు. - మీ  కరణం)

ఆకాశవాణి

//ఆకాశవాణి//

              
                                                        - కరణం కళ్యాణ్ కృష్ణ కుమార్
                                                                           05.07.2014

ఈ తొలిసంధ్యలో
తీయని ఆ స్వరమధురిమ
నను చేరగనే..

ఏ జన్మ సువాసనలో..
ఏ పూర్వపు సరిగమలో..
ఏ స్మృతుల మేలుకొలుపో..

నా హృదయానికి
ఉదయపు చూపు పూయించి

నా మాటలకు
ఓంకారాక్షరం రాయించి

నా బడలికలకు
ప్రాణవాయువు ప్రసాదించి... ,

ఆహా..!!
ఎంతటి అశ్వచల శక్తి ఆ కంఠసీమలో..
ఎంతటి భావ ధనావేశం ఆ తీయతీయని స్వరఝరిలో..
ఎంతటి మనోల్లాస తరంగధైర్ఘ్యం ఆ చిలకపలుకులలో..

ఏమని చెప్పను ప్రియా..!
నిను రోజూ వినాలని వుంది..
నీ ధ్యాసలో గడపలని వుంది..
నీ కౌగిలిలో కరిగిపోవాలనుంది
నీ ఒడిలో ఒదిగి పోవాలనుంది..

ఏమై పోయావోయ్..!
నా రాణీ 'ఆకాశవాణి '..
తాళలేని నీ విరహవేదనలో..
నన్ను,  నీకై మింటిలో కలిసిపోనీ..!!

(రేడియో వినడం అలవాటై ...పొద్దుటే వినబడక పోతే రేడియో శ్రోత బాధ ఇలా వుంటుందన్నమాట..!)

సద్గురువుకి వర్ణమాల

                  // సద్గురువుకి వర్ణమాల //
                                               - కరణం కళ్యాణ్ కృష్ణ కుమార్
                                                                          12.07.2014



అజ్ఞాన అంధకారాన్ని వెలుగుతో నింపే ఓనమాలు దిద్దించి
ఆకాశపు హద్దులు అందించే విద్యాబుద్ధులు నేర్పించి
ఇలలో నడతకు క్రమశిక్షణ నడకలు నేర్పి
ఈలోకాన మమ్ము మనుషులుగ  మార్చి
ఉన్మత్తులైన మమ్ము ఉత్తములుగా తీర్చి
ఊహించని ఎత్తుకు ఎదిగేందుకు నిశ్రేణి పేర్చి
ఋషిలా, యోగిలా, వ్యాసమునిలా యుగయుగాలుగ
ఎన్నో ..మరెన్నో విజ్ఞాన పుష్పాలు పూసగుచ్చి తెచ్చి
ఏజన్మ వరమో..మాకు ... ఏ నాటి ఫలమో
ఐక్యత , సఖ్యత, వినయశీలత అలవరచిన మిమ్ము
ఒక్కసారి తలచిన చాలు ఒనగూరు ఫలాలు..
ఓపలేనంత ఆనంద పరవశాలు
ఔషదాలె మాకు  మీ శిక్షలు ,పరీక్షలు..
అందుకే మేమెప్పుడు మీకు ఋణగ్రస్తులం..
అ(:)హం అదుపు నుంచి మిమ్ము తలచుకుంటూనే ఉంటాం..

       అంతటి గురువులైన మీరు....  

కమ్మని కథలతో మమ్మలరించిన క్షణాలు
ఖడ్గము ,కలమే యని ఆ పదును చూపిన రోజులు
గతించిన ఆ కాలం కళ్లముందే ఉంది.. ఈ నాటి మా ఈ -
ఘన కీర్తి మీ చలువె గా .....వా-
ఙ్మ య భూషణా .. గురుదేవరా..!

  చదువు తోటి ఆటలు , పాటలు, మాటలు
  ఛత్రిలాంటి ఛంధోబద్ద, అలంకారయుతంగా..
  జన్మంతా మనోఫలకం పై ముద్రితమయ్యేలా స్వర-
  ఝరి తో రాగ మాలపించి.. మరీ
  జ్ఞానమందించిన బాదరాయణా..!

తరము తరము నిరతము క-
థగా చెప్పెదము మీ బోధనా పటిమ
దరి చేర్చు, తిమిరము నుంచి అమరమునకని..
ధన మదియె మాకు వేల కోట్లు
నడియాడె దైవమా.. నరుడైన వ్యాసరూపా..!

  పలక పట్టించిన గురువుగ
  ఫలమెన్నడు మీరు కోరలేదు..
  బలపము పట్టిన నాడె
  భక్తి భావము తో మిమ్ము కొలిచేము.. మా-
  మనమున మీరె నిండె మా జ్ఞాన వితరణి..!

యమునా తీరాన అర్జునునకుపదేశి
రక్కసుల సరి ద్రోవ జూపిన శుక్రసామి
లవ కుశుల దీర్చిన వాల్మీకి..
వసుధన వినుతికెక్కిన ద్రోణాచారి
శరము బట్టి చూపిన కౌశిక ముని
షట్ చక్రములు చూపిన యోగ బ్రహ్మ
సరిలేరు నీకెవ్వరూ ఈ జగత్తున
హరికి అంతరాత్మవై.. మనో నేత్రమై.. తా-
ళపత్రమై .. విశ్వ భవితకు మార్గదర్శివై
క్షరము కాని అక్షరములతో (మము) సానబెట్టిన పరుసవేది.. మ-
ఱపు లేకుండా జేసి..మదిలోనె లోనె పూజలందుకొను పుణ్యపురుషా..!

  పామరులమైన మాకు విజ్ఞానమొసగిన మీ తపస్సు
  మా ముంగిట చీకటిని పారద్రోలిన ఉషస్సు
  విద్యాదాన యజ్ఞంలో మీరో హవిస్సు
  తేనె కన్న తీయన మీ మనస్సు
  భువి ఉన్నంత వరకు నిలుచు మీ యశస్సు
  మీ పాదపద్మములకు ఇదే నా హృదయ నమస్సు..!!
            

(అ నుంచి  ఱ వరకు అన్ని అక్షరాలతో గురువుకి వేసిన వర్ణ మాల ఇది.. గురుభ్యోనమ:)

జలతారు దీపాలు కవిత పై ఓ సమీక్ష - శ్రీ పుష్యమి సాగర్

 (  నేను వ్రాసిన జలతారు దీపాలు కవిత చదివి శ్రీ పుష్యమి సాగర్ గారు స్పందించి వ్రాసిన రీవ్యూ ఇది.. సమీక్షలు  అడిగి వ్రాయించుకునే ఈ రోజుల్లో ఓ కవితకకు ఇంతగా స్పందించి సమీక్ షవ్రాసిన రచయిత, కవి శ్రీ పుష్యమి సాగర్ గారికి కృతజ్ఞతలు తెలుపుకుంటూ.. వారు వ్రాసిన సమీక్ష యథాతథం గా ఇక్కడ పొందుపరుస్తున్నా..! సమీక్షకులు శ్రీ పుష్యమి సాగర్ గారి చిత్రాన్ని కూడా అభిమానంతో  ఇక్కడ ఉంచుతున్నా..   - మీ కరణం )

!!నచ్చిన కవిత !!  -   
                          -   పుష్యమి సాగర్,  హైదరాబాద్
                               నవంబర్ 13'2014  9:31pm                                 

//జలతారు దీపాలు//   ! కరణం కళ్యాణ్ కృష్ణ కుమార్ !
______________________________
ఈ కవిత ను చూసాక నాకు అప్పుడు ఎప్పుడో "అలిసెట్టి ప్రభాకర్ " రాసిన "వేశ్యా" వృత్తి లో వున్నా ఆడపడుచు ఎంత

శ్రీ  పుష్యమి సాగర్

దారుణం గా ఉన్నదో అనిపించిది .."తను పుండై , మరొకరి పండై " ....గుర్తుకు తెప్పించారు ..ఆర్దత, ఆర్తి, మరికాస్త బాద, అందులోంచి వచ్చిన ఆవేశం .వెలియాలి దుస్థితి ని పట్టించుకోని పాలకుల పై ఎక్కుపెట్టిన బాణం ఇది
వెలియాలు ఈ కలం లో అయినా కూడా నలుగురికి చెందినా ఆస్తి గా నే భావిస్తుంది ...ఈ సమాజం ..అది రూల్ గా మార్చేసారు ..... మరి పెళ్లి కాకుండా అన్యాయం గా గొంతు నులిమి సాని కొంప లో దించాక ...పాపం ఆ పిచ్చిది మాత్రం ఏమి చెయ్యగలదు ...
!!ఎర్రనీళ్ళు చూడకుండానే//కస్టమర్ కి పరుపైనప్పుడు!! చూడండి పెళ్లి కాకుండా బలవంతం గా పడుపు వృత్తి లోకి దింపబడి పరుపులేక్కడం దారుణం కాదా...
పాలకుల స్వార్ధ ప్రయోజనాన్ని, మెడ లొ కుక్క బిళ్ళ వేసినట్టు పడుపు వృత్తి కి లైసెన్సు ఇవ్వడం అమాఅనీయమైన దారుణం. ఇది ఎన్నో సంవత్సరాల నుంచి వస్తున్నా ఎప్పుడు పట్టించుకోని పాలక వర్గం ...ఇప్పుడు మాత్రం లైసెన్స్ ఇచ్చి మరి మంచం ఎక్కమంటారు ఏమి దారుణం ...
ఆడుతూ పాడుతు చిందాడే వయస్సులో //అవాంచిత గర్భం దాల్చినప్పుడు..//ఏమైందో అర్ధం కాక పిచ్చిచూపులు చూసినప్పుడు //అప్పుడు పట్టని ఓ పాలకా..! ఇప్పుడు నీకింత ప్రేమోంటో..?
పై పంక్తులలో చితికిపోయిన బాల్యం కిడ్నాప్ చెయ్యబడి పడుపు వృత్తి లో తోసేసినప్పుడు ....ఇంకా ప్రత్యుత్పత్తి అంటే కూడా తెలియని వయసులో గర్బం దాల్చి పిచ్చి దాని లా మారినపుడు ఏమి అయ్యారు పాలకుల్లారా ?? సమాధానం దొరకని ప్రశ్నే ....
అభం శుభం తెలియని బాల్యాన్ని దొంగిలిచి వేరే వారికి అమ్మేసినప్పుడు, ప్రేమ పేరు తో నమ్మిన వాడు నట్టేట ముంచి సాని కొంప లో పడేసి వెళ్ళినప్పుడు, ..., ముసలితనం లో కూడా కోరిక చావక డబ్బు తో తనన శరీరానికి వేల కట్టి వేలం వేసినపుడు జారిన కన్నీళ్ళ కు సమాధానం చెప్పాలి పాలకుల్లారా .
!వాడెవడో ముసలి మదపుటేనుగు//వేలం పాటకి అంగడి బొమ్మై ఆడినప్పుడు ..//. కన్నీటి మరక చెంపపై జారినప్పుడు..!
వ్యవస్థ లో సామాజికం గా అన్ని చోట్ల వివక్ష త ని ఎదుర్కుంటారు ...నాలుగు మెతుకుల కోసం తమ శరీరాన్ని తనువూ తో సంబంధం లేకుడా ఆత్మని చంపేసుకున్న మేఘాలు వాళ్ళు ...నిజమే ...
కడుపు చించుకు కాలిపై పడ్డ భోగ బ్రతుకులు//గుప్పెడు మెతుకులకై సిగ్గు మరిచిన జీవితాలు
పిపీలకం లా చిదిమేయబడ్డ కరిగిన మేఘాలు//
ఒడలు, కాలిన సిగిరెట్ల కు యాష్ ట్రేగా మారినప్పుడు//మెడుకు, ఉచ్చువేసి వెర్రినాకొడుకులు మూత్రం తాపినప్పుడు//నగ్నంగా వేలాడదీసి వీడియోలు తీసినప్పుడు.. //వద్దన్నా వినకుండా రక్షణ తొలిగించి రమించినప్పుడు
తన శరీరం తో ఎంత దారుణం గా ఆడుకున్నారో మానవత్వం కూడా మరిచి మృగాల్ల త్రుస్న తీర్చుకున్నప్పుడు ఎన్ని వేలా సార్లు సచ్చిపోయిందో కదా ఆ ఆడ బిడ్డ
ఇదే పంక్తులలో
//కోతి చేష్టలతో చేష్టలుడిగి.. కోతి రోగాలల్లుకున్నప్పుడు //చీకి చీకి చిక్కి శల్యమై అందాల భామ//ఈగల ఆవాసమైనప్పుడు //తనతో కులికినోళ్ళళ్ళా, నోరెళ్ళబెట్టి వెళుతూ //తానెవ్వరో తెలీయనట్లు ..నటులైనప్పుడు ..///
అందమైన భామ గా ఉన్నప్పుడు రోగాలను అంటించి ఒక సజీవ శవం గా మార్చి కళ్ళెదురుగా ఏమి తెలియని వాళ్ళలా నటిస్తుంటే మనిషి గా ఆమె ని మనమే చంపెసాము కదా....
"మా కుళ్ళిన బ్రతుకుల్లో .. //వెలుగు నింపేందుకు మాకు లైసెన్సులిత్తారా??"
ఇంత దారుణ స్థితి లో మేము మా బతుకులను లాగుతుంటే పాలకుల్లారా పాడుబడ్డ ఈ వృత్తి కి లైసెన్సు ఇచ్చి చట్టబద్దం చేస్తారా....ఇంకా మరెందరి ఆడపడుచల జీవితాలతో ఆడుకుంటారు ...అంటూ కవి తన ఆవేదన ని ఆవేశాన్ని వ్యక్తం చేస్తారు
అవును, చట్టబద్దం చేసాక బాబు నేను వెశ్యను ....నాకు ఇంత ధర వున్నది మార్కెట్ లో రండి అని ఒక విలాస వస్తువు కు ట్యాగులేసుకుని పురుష ప్రపంచం లో తలొంచుకొని ఉండాలా...?.....చట్టం పోలీసులు వుంటే నే డబ్బులు ఇచ్చి ..చుట్టం గా మార్చుకున్న మీ కు ఇక లైసెన్సు ఇస్తే ...అంటీ లకు అమ్మడు అవ్వలా చట్ట ప్రకారం గా ...?.
మేము ట్యాగులేసుకుని తిరగాలా? //చట్టం ఉంటేనే, చుట్టంగా మార్చుకున్న మీకు//బాండ్లు రాసి ఆంటీలకు అమ్ముడవ్వాలా??
చివరాగా ఇలాంటి దయనీయమైన జీవితం లో నుంచి జన జీవన స్రవంతి లో కి రావాలన్న తపన ఉన్న కూడా రాలేని పరిస్థితి లో నేడు వొళ్ళు అమ్ముకుంటున్న అబాగ్యులు వాళ్ళు ...మాకు మాములు జీవితం గడుపుకునేదుకు అవకాశం ఇవ్వండి ...మీరు మమ్మల్ల్ని ఉద్ధరించ అవసరం లేదు .. వెలుగు లో కి తీసుకుపోక పోయినా పర్లేదు కాని ...చీకటి నరకపు కూపం లో తోయ్యకండి ...మమ్మల్ని మనుషులు గా బతకనివ్వండి అంటూ దీనం గా వేడుకుంటూ ముగింపు ఇవ్వడం చాల బాగుంది ...
నిశి కమ్మిన జీవితాలకు //వెలుగుబాట కాకున్నా మేలేన్నా..//దీపంపురుగుల్లా మార్చొద్దు.
మలమల మాడ్చొద్దు.. //మమ్ము ఏమార్చవద్దు..
ఈ కవి కి వారి జీవితాన్ని మాటల్ల్లో, అనుభవాల్లో దగ్గర వుండి చూసి అక్షరం గా మలిచిన తీరుకు అబ్బురం అనిపిస్తుంది ..కవితా వస్తువు కాని ...శైలి కాని ...వ్యక్త పరచటం లో కాని బిన్నం గా వున్నది ...ఎప్పుడైనా వాస్తవం చేదు గానే వుంటుంది కదా..ఎందుకో వీరి కవిత చదివాక మరేమీ చదవాలని అనిపించదు ...వ్యవస్థ లో బలవంతం గా దోచుకోబడ్డ అబాగ్యురాలి దీన గాద ను అక్షరీకరించిన తీరు బాగుంది ...
వారు మరిన్ని మంచి కవితలు రాయాలని కోరుకుంటూ
సెలవు
పుష్యమి సాగర్.. 13.11.2014


//జలతారు దీపాలు//

సగం గుడ్డలేసుకున్న దిక్కుమాలిన బ్రతుకుల్లో ..
వెలుగు రేఖవ్వడం మరిచావా ఓ పాలకా..!

దిక్కులు చూస్తూ.. అటూ ఇటూ పోయే వాళ్ళకు
వెర్రి సైగల కేకలేస్తూ..
కడుపు చించుకు కాలిపై పడ్డ భోగ బ్రతుకులు
గుప్పెడు మెతుకులకై సిగ్గు మరిచిన జీవితాలు
పిపీలకం లా చిదిమేయబడ్డ కరిగిన మేఘాలు

ఎవడబ్బో తెలియక వచ్చిపోయేవాణ్నల్లా చూస్తుంటే.. "
అందాల బొమ్మ రేటెంతో" అన్న వాడి ]
వెకిలి చేష్టలకు విస్తుపోయినప్పుడు
ఏం వాగాడో అర్ధం కాక బిత్తరపోయినప్పుడు..

వాడెవడో ముసలి మదపుటేనుగు
వేలం పాటకి అంగడి బొమ్మై ఆడినప్పుడు ..
. కన్నీటి మరక చెంపపై జారినప్పుడు..

ఎర్రనీళ్ళు చూడకుండానే
కస్టమర్ కి పరుపైనప్పుడు
ఒకడికి ముగ్గురు కుక్కలై
నల్లిలా నలిపినప్పుడు
తాగినోడు జుట్టీడ్చి తన్నినప్పుడు..
వెగటు వేషాలేసినప్పుడు..
ఆడుతూ పాడుతు చిందాడే వయస్సులో
అవాంచిత గర్భం దాల్చినప్పుడు..

ఏమైందో అర్ధం కాక పిచ్చిచూపులు చూసినప్పుడు
అప్పుడు పట్టని ఓ పాలకా..! ఇప్పుడు నీకింత ప్రేమోంటో..?
ఒడలు, కాలిన సిగిరెట్ల కు యాష్ ట్రేగా మారినప్పుడు
మెడుకు, ఉచ్చువేసి వెర్రినాకొడుకులు మూత్రం తాపినప్పుడు
నగ్నంగా వేలాడదీసి వీడియోలు తీసినప్పుడు..
వద్దన్నా వినకుండా రక్షణ తొలిగించి రమించినప్పుడు
కోతి చేష్టలతో చేష్టలుడిగి.. కోతి రోగాలల్లుకున్నప్పుడు
చీకి చీకి చిక్కి శల్యమై అందాల భామ
ఈగల ఆవాసమైనప్పుడు
తనతో కులికినోళ్ళళ్ళా, నోరెళ్ళబెట్టి వెళుతూ
తానెవ్వరో తెలీయనట్లు ..నటులైనప్పుడు ..

అప్పుడు గుర్తురాని మా పాపపు జీవితాల్లో ...
మా కుళ్ళిన బ్రతుకుల్లో ..
వెలుగు నింపేందుకు మాకు లైసెన్సులిత్తారా??
మేము ట్యాగులేసుకుని తిరగాలా?
చట్టం ఉంటేనే, చుట్టంగా మార్చుకున్న మీకు
మా పై ఇంత ప్రేమేంటో??
బాండ్లు రాసి ఆంటీలకు అమ్ముడవ్వాలా??

మీ దారేంటో కాస్త తెలుసుకో.. !
మాకేం కావాలో అడిగి తెలుసుకో ..!
జనాల మనసుల్లో ఏది గూడైందో వెతుకు ఫో..!

నిశి కమ్మిన జీవితాలకు
వెలుగుబాట కాకున్నా మేలేన్నా..
దీపంపురుగుల్లా మార్చొద్దు.
మలమల మాడ్చొద్దు..
మమ్ము ఏమార్చవద్దు..

                    - కరణం కళ్యాణ్ కృష్ణ కుమార్
                                         - 08.11.2014

జలతారు దీపాలు

//జలతారు దీపాలు//

                                                                                     - కరణం కళ్యాణ్ కృష్ణ కుమార్              

                                                                                             08.11.2014

 

సగం గుడ్డలేసుకున్న దిక్కుమాలిన బ్రతుకుల్లో .. 

వెలుగు రేఖవ్వడం మరిచావా ఓ పాలకా..!

దిక్కులు చూస్తూ.. అటూ ఇటూ పోయే వాళ్ళకు 

వెర్రి సైగల కేకలేస్తూ.. 

కడుపు చించుకు కాలిపై పడ్డ భోగ బ్రతుకులు

గుప్పెడు మెతుకులకై సిగ్గు మరిచిన జీవితాలు

పిపీలకం లా చిదిమేయబడ్డ కరిగిన మేఘాలు

ఎవడబ్బో తెలియక వచ్చిపోయేవాణ్నల్లా చూస్తుంటే.. 

"అందాల బొమ్మ రేటెంతో" అన్న వాడి 

వెకిలి చేష్టలకు విస్తుపోయినప్పుడు..

ఏం వాగాడో అర్ధం కాక బిత్తరపోయినప్పుడు..

వాడెవడో ముసలి మదపుటేనుగు

వేలం పాటకి అంగడి బొమ్మై ఆడినప్పుడు ..

కన్నీటి మరక చెంపపై జారినప్పుడు..

ఎర్రనీళ్ళు చూడకుండానే

కస్టమర్ కి పరుపైనప్పుడు

ఒకడికి ముగ్గురు కుక్కలై 

నల్లిలా నలిపినప్పుడు

తాగినోడు జుట్టీడ్చి తన్నినప్పుడు.. 

వెగటు వేషాలేసినప్పుడు..

ఆడుతూ పాడుతు చిందాడే వయస్సులో 

అవాంచిత గర్భం దాల్చినప్పుడు..

ఏమైందో అర్ధం కాక పిచ్చిచూపులు చూసినప్పుడు 

అప్పుడు పట్టని ఓ పాలకా..! ఇప్పుడు నీకింత ప్రేమోంటో..?

ఒడలు, కాలిన సిగిరెట్ల కు యాష్ ట్రేగా మారినప్పుడు

మెడుకు, ఉచ్చువేసి వెర్రినాకొడుకులు మూత్రం తాపినప్పుడు

నగ్నంగా వేలాడదీసి వీడియోలు తీసినప్పుడు.. 

వద్దన్నా వినకుండా రక్షణ తొలిగించి రమించినప్పుడు 

కోతి చేష్టలతో చేష్టలుడిగి.. కోతి రోగాలల్లుకున్నప్పుడు 

చీకి చీకి చిక్కి శల్యమై అందాల భామ

ఈగల ఆవాసమైనప్పుడు

తనతో కులికినోళ్ళళ్ళా, నోరెళ్ళబెట్టి వెళుతూ 

తానెవ్వరో తెలీయనట్లు ..నటులైనప్పుడు..

అప్పుడు గుర్తురాని 

మా పాపపు జీవితాల్లో ... 

మా కుళ్ళిన బ్రతుకుల్లో .. 

వెలుగు నింపేందుకు మాకు లైసెన్సులిత్తారా??

మేము ట్యాగులేసుకుని తిరగాలా? 

చట్టం ఉంటేనే, చుట్టంగా మార్చుకున్న మీకు

మా పై ఇంత ప్రేమేంటో?? 

బాండ్లు రాసి ఆంటీలకు అమ్ముడవ్వాలా??

మీ దారేంటో కాస్త తెలుసుకో.. !

మాకేం కావాలో అడిగి తెలుసుకో ..!

జనాల మనసుల్లో ఏది గూడైందో వెతుకు ఫో..!

నిశి కమ్మిన జీవితాలకు 

వెలుగుబాట కాకున్నా మేలేన్నా..

దీపంపురుగుల్లా మార్చొద్దు. 

మలమల మాడ్చొద్దు.. !

మమ్ము ఏమార్చవద్దు..!!

 

            

పంచాక్షరి

(ముక్తపదగ్రస్తం అనే పద్దతిలో నేను వ్రాసిన శివ స్తోత్రం ఇది... దీనిలో ప్రతి  పాదం  లోని   చివరి పదం  తరువాత పాదం  మొదటి పదం గా వ్రాయడం జరిగింది. )

// పంచాక్షరి //
                                                                           - కరణం కళ్యాణ్ కృష్ణ కుమార్
                                                                                                17.11.2014

శివ నామమే సర్వం శరణం
భవ భయ హరణం హరణం

పంచాక్షరి మంత్రం పరిరక్షితం
పరిరక్షిత మంత్రం ప్రచండం
ప్రచండ మంత్రం ప్రమోదం
ప్రమోద మంత్రం ప్రణమామ్యహం

అఖండ తేజోమయం అనంతం
అనంతకోటి తత్త్వం ఆనందం
ఆనంద నందనం అశేషం
అశేష భక్త సులభం అర్ధనారీశ్వరం

నిర్మల పూజితం నిఖిలం
నిఖిల చరితం నిర్గుణం
నిర్గుణ కారకం నిగూఢం
నిగూఢ సత్యం నమ:శివాయం 

త్రినేత్రం త్రిభువన భూషితం
భూషిత సర్పచంద్ర విరాజితం
విరాజితమే రూపం విలక్షణం
విలక్షణ భోళాతత్వం లోక రక్షకం

 

త్రిశూలం చరాచర సృష్టి రహస్యం
రహస్యమే విరాగి జీవనం
జీవనమే సకలకోటి స్ఫూర్తికారకం
కారకమే దక్షయజ్ఞ వినాశకరం, దేవం
 
భస్మధారణ దర్శనం భయావహం
భయావహ తాండవం కామదహనం
దహన ప్రదేశం నిత్యనివాసం
నివాసమే సర్వభక్త హృదయం, శివం

పతీత పావనం ఓంకారనాదం
ఓంకారమే జగత్ గమనం
గమనం ఆదిభిక్షుం నమామిం
నమామీశ్వరం పార్వతీ పతిం, హరం

                                    

   (కార్తీక సోమవారం ఉపవాసదీక్ష సమయం ..)

•