మా ఇంట్లో ఓ జెంటిల్ మన్ (వీడు చాలా కంత్రీ)
హాయ్ మిత్రాస్..!
మీకు మా పెద్దవాడు శ్రీరాం శరణ్ గురించి మీలో చాలామందికి తెలుసు.. వాడిప్పుడు మెడిసిన్ ఫస్ట్ ఇయర్ చేస్తున్నాడు.. కానీ చిన్నోడి గురించే ఎక్కువగా తెలీదు.. వాడి గురించి చెప్ఫే సందర్భాలూ తక్కువే వచ్చాయ్.. మా చిన్నోడి పేరు శ్రీశ్యాం శరణ్.. ఇక వీడికి ఇంటర్ లో మంచి మార్కులే వచ్చాయి... కాకుంటే ఎంపిసి కనుక.. బైపిసి అంత విజన్ ఉండదు కదా..! ఇంటర్ లో 943 మార్కులు సాధించి 95 శాతానికి చేరువయ్యాడు.. వీడు చదివింది హైద్రాబాద్ కెపిహెచ్‌బి లోని శ్రీ చైతన్య కాలేజ్ లోనే.. !(పెద్దవాడు శ్రీరాం శరణ్ కూడా అక్కడే లేండి.) ఇంటర్ లొ మంచి మార్కులే సాధించడంతో ఊపిరి పీల్చుకున్నాము.. ఇక ఇంజనీరింగ్ ఓ పెద్ద ప్రహసనం.. యూనివర్శిటీల, కళాశాలల మెసేజ్ లు, వాటి వివరాల సేకరణతో తల బొప్పికట్టింది.. మా వాడు మొదట చెన్నై అన్నాడు.. కాదు కాదు ఊహు వెల్లూరు అన్నాడు.. కానే కాదుదు పంజాబ్ lu అన్నాడు.. కాదు పాండిచ్చేరి.. ఇలా దేశం మొత్తం కంప్యూటర్ ముందు కూర్చుని తిరిగిన పరిస్థితి మాది..! అందరినీ అడగటం, ఆయా కాలేజ్ వివరాలు తెలుసుకోవడం.. ఇదీ మా ఇంటిల్లిపాది దినచర్య.. ఆ ఫీజుల, శబ్ధాలు గుండెల్లో రైళ్ళ శబ్దాలు చేస్తూనే ఉన్నాయి.. ఏమి చేయాలో పాలుపోని పరిస్థితి.. నా సంకట స్థితి తెలుసుకున్న కొందరు ఎఫ్బి ఫ్ర్రెండ్స్ స్వచ్చంధ సంస్థలనీ ఎడ్యుకేషన్ లోన్ కోసం సంప్రదించారంటే మా పరిస్థితి ఎలా ఉందో మీకర్ధమయ్యే ఉంటుంది.. చివరకు ఏపి ఎంసెట్ రిజల్ట్స్ వచ్చాయి.. 6930 వ ర్యాంకు వీడు సాధించాడు.. ! సంబరాలే మాఇంట.
ఎక్కడ ఏమిటి ఎలా..??
ర్యాంకు వచ్చిందన్న సంబరం కన్నా ఎక్కడ చేర్చాలన్నది మరో ప్రశ్న..! వాడి ర్యాంకుకు వచ్చే కాలేజీలేవి.. వాడు ఇష్టపడుతున్న కాలేజీలేవీ//? చివరకు మావాడు ఫైనల్ చేసిన కాలేజీలన్నీ ఫీజుల మోతలా కనబడ్డాయి.. అయినా వాడిని చేర్చేద్దాం అని నిర్ణయించుకున్నాము.. కొందరేమో బయట రాష్ట్రాల్లో చేర్పించమని సలహా..! అక్కడి విద్యార్ధులేమో.. నో.. ఇక్కడస్సలు చేర్చవద్దని వేడుకోలు.. ఈ గందరగోళం లో చివరకు ఏమి చేయాలో తెలీని సంధిగ్ధ స్థితిలో ఏపి ఎంసెట్ వెబ్ ఆప్షన్స్ మొదలయ్యాయి.. మరేమైంది..?
అక్కడికే వస్తున్ననండోయ్...! వెబ్ ఆప్షన్స్ ఎంపికలో మేము కొత్త పద్దతి అవలంబించాము.. ముందు ఎక్కడ కావాలి? తరువాత ఏ బ్రాంచ్ కావాలి అనే ప్రాతిపదికన గతం లోని ఆయా కళాశాలల రికార్డ్స్ పరిశీలించి... ఓ పది కళాశాలలు ఆప్షన్స్ గా ఎంపిక చేసుకున్నాం.. అందులో ఒకటి " జిన్," .. కొత్త గా ఉంది కదూ.. అవునండీ.. జియో-ఇన్‌ఫర్‌మాటిక్స్ అనే బ్రాంచ్ కూడా ఉంది.. ! దేశంలో రెండు యూనివర్శిటీలే ఆఫర్ చేస్తున్నాయి.. ఒకటీ అన్నమలై చెన్నై, రెండు ఆంధ్రా యూనివర్శిటీ, వైజాగ్..
ఊహించనిది...!
అనుకోకుండా..ఫస్ట్ కౌన్సిలింగ్ లో మా వాడికి జియో ఇన్‌ఫర్‌మాటిక్స్ ఆంధ్రాయూనివర్శిటీ కాంపస్, వైజాగ్ లో వచ్చింది... మేము విజయవాడలో వస్తుందనుకున్నాం.తొమ్మిదో ఆప్షన్ లో సరదాగా పెట్టిన 'జిన్' రావడంతో మేమంతా షాక్..మరలా డీలా..! (అందుకే వెబ్ ఆప్షన్స్ పెట్టేటప్పుడు ఎవరైనా సరే ఊహలు, నమ్మకాలు, సరదాలు తగ్గించుకోవాలి)
ఏంచేసేది లేక, వైజాగ్ వెళ్ళి యూనివర్శిటీ, దానితో పాటు, జిన్ బ్రాంచ్ కి వెళ్ళి వివరాలు తెలుసుకొని వచ్చాము.. నిజానికి అదొక మంచి కోర్స్ అని అర్ధమైంది.. సో సెకండ్ కౌన్సిలింగ్ లో విజయవాడలో సిఎస్‌సి రాకపోతే గనుక అక్కడే వైజాగ్ లో జిన్ లోనే జాయిన్ చేయాలని నిర్ణయించుకున్నాం.
ఇక్కడ మా ఫ్రెండ్, నందిని గారికి, వారి అమ్మగారికి కృతజ్ఞతలు తెలపాల్సిందే..! మేము వెళ్ళిన దగ్గర నుంచి తిరిగి వచ్చేంతవరకూ వారు చేసిన సహాయం మరువరానిది.. వారింట్లో చేసిన లంచ్ కూడా..! థాంక్యూ నందిని..
రెండో కౌన్సిలింగ్ కోసం ఎదురుచూపులు.. :
పెళ్ళి చూపుల కోసం కూడా అంతలా ఏ ఏజ్ బార్ అమ్మాయి కూడా ఎదురు చూడదేమో అనిపించేంత గా ఎదురుచూశాం రెండో కౌన్సిలింగ్ డేట్ కోసం..! చివరకు పదహారన్నారు.. మరలా పోస్ట్ పోన్ చేశారు చివరకు 23న వెబ్ ఆప్షన్స్ కి తలుపులు తెరిచారు... ఆప్షన్స్ లో జాగ్రత్తగా విజయవాడలోని రెండు కాలేజీల్లో ఆరు బ్రాంచ్ లు, గుంటూరులోని ఒక కాలేజ్లో మూడు బ్రాంచ్ లు పెట్టాం రాకున్నట్లైటే తిరిగి వైజాగ్ వెళ్ళీపోవాలని నిశ్చయంతో!,..!
ఇంతకీ ఎక్కడ వచ్చింది..?
26 సాయంత్రం ఫైనలైజ్ అని చూసి ఉసూరంటూ ఊరుకున్నాం.. కానీ.. 25 సాయంత్రానికే ఎలాట్‌మెంట్ అయిపోయింది.. విజయవాడ లోని పొట్లూరి.వి.సిద్ధార్ధ ఇంజనీరింగ్ కళాశాలలో కంప్యూటర్ ఇంజనీరింగ్ బ్రాంచ్ లో సీటు వచ్చింది.. రూ.97 వేలు సంవత్సరానికి ఫీజ్...!
మరెలా..??
అన్నట్లు చెప్పనే లేదు కదూ.. పదివేలు ర్యాంక్ లోపల సీట్ వచ్చిన వారికి ఆంధ్రప్రదేశ్ ప్రభుత్వం ఉచితంగా విద్యనందిస్తోంది.. ఇంజనీరింగ్ లో.. ! (ఇటీవల తెలంగాణా ప్రభుత్వం కూడా ప్రకటించిందనుకుంటా..!)
సో....మా చిన్నోడు శ్రీశ్యాం శరణ్ కూడా ఫ్రీసీట్ సంపాదించాడండోయ్..!
పెద్దవాడు శ్రీరాం శరణ్ మెడిసిన్ లో ఫ్రీ సీట్ సంపాదిస్తే,..>! చిన్నవాడూ ఇంజనీరింగ్ లో ఫ్రీ సీట్ సంపాదించి.. మా కుటుంబం ఆనందాన్ని వెయ్యింతలు చేశాడనటంలో సందేహమే లేదు..! ఈ విద్యామహాయజ్ఞంలో మాకు ఎప్పుడు అండగా ఉండే మా తమ్ముళ్ళు లక్ష్మినారాయణ, కృష్ణచైతన్య, మరదళ్ళు భారతి, ఆనందలక్ష్మిలకు నా కృతజ్ఞతాపూర్వక ఆశీస్సులు..
ఇంతకీ విజయవాడ సీటు రావాలని దేవుళ్లను కోరుకున్న మా అమ్మ శ్రీమతి స్వరాజ్యలక్ష్మీసుబ్బారావు, నా శ్రీమతి రమా గాయత్రి ల ఆనందం మాత్రం చెప్పనలవి కావటం లేదు..
ఇదండీ సంగతి.. మీ ఆశీస్సుల జల్లు మా చిన్నవాడు శ్రీశ్యాం శరణ్ పై కురిపిస్తారని ఆశిస్తూ.. _ మీ కరణం
