//మౌనముని//

//మౌనముని//

     - కరణం కళ్యాణ్ కృష్ణ కుమార్, 29.05.2015

తనకు తాను భారమైనా
తాను ఏడ్వలేకున్నా..
తన స్తనాలెండి* పోతున్నా..
వాన మబ్బులు..
నీటి జాడలు
ఎండమావులైనా..
వేడి సెగలు ఉడికిస్తున్నా..
ఉక్కపోతకు ఊపిరి ఆగుతున్న

నిన్నుకన్న పాపానికి,,
నిన్ను మోస్తూనే ఉంది..
తనంతట తానేమీ అడగని అభాగిని
నిన్ను,నీతల్లినిగన్న ఈ ‘అవని’...
గుక్క నీరులేక
నోరు తెరిచేసింది..
నిలువ నీడలేక
భోరున విలపిస్తోంది..
నిప్పుల కుంపటిలా మారి
నిన్నే వెక్కిరిస్తోంది.   
నీ స్వార్ధానికి..
నీ స్వంతానికి,
నీ పంతానికి,
నీవు నరికిన పచ్చచెట్టు కోసం
ఆవురావురు మంటున్నది..
అక్సిజన్ ఎక్కడంటున్నది..
నీ  స్వప్రయోజనా చర్యలతో
బిత్తరపోతోంది..
బావురుమని..
చెమ్మగిల్లుతోంది.

ప్రచండ భానుడిని నిలువరించ
మొక్కనొకటి పెంచమంటూ
అంతకన్నా వేరఖ్కర్లేదంటూ..
దీక్షబూని రమ్మంటూ..
మౌనమునిలా చేతులు చాస్తోంది..
మలయమారుతమై
ఊపిరులూదమంటోంది.  

అంచలంచెలుగ పెరిగే భూతాపం ఆప,
ఒక్క మొక్కనైనా పెంచమంటోందిరా..
ఇంతకాలం తానేమీ అడగలేదుగా..
ఒక్కసారి మనసారా తన కోర్కె తీర్చరా.!
జన్మభూమి గొప్పదనం ఇంతని చెప్పలేమురా..
ఋణం  తీర్చుకోను మొక్క ఒక్కటి చాలురా!

నేటి మొక్కలే రేపటి ప్రకృతి
నేటి మొక్కలే రేపటి నీటిజాడ
నేటి మొక్కలే రేపటి జీవితం
నేటి మొక్కలే రేపటి అరణ్యం

పచ్చదనం మనకు శ్రీరామ రక్షరా..!
పచ్చదనం మనకు మూలధనం సోదరా..!
భవితలోన ఆనందపు సౌందర్యం చూడరా..!
                        - కరణం

(స్తనాలెండి పోతున్నా = చెరువులెండిపోతున్నా)
                                                                     

అశోకుడు చెట్లు నాటించెను..

"అశోకుడు చెట్లు నాటించెను.."
                              -  కరణం కళ్యాణ్ కృష్ణ కుమార్ , 26.05.2015

    "అప్పుడెప్పుడో అశోకుడు నాటిన చెట్ల గురించి ఇప్పుడు మాకెందుకు సార్.. చరిత్ర ఉత్త చెత్త" అనేవాళ్ళో..అనుకునే వాళ్ళు కోకొల్లలు.. నిజంగా ఆ పాఠాలు ఇప్పుడు పిల్లలతో పాటు పెద్దలకీ వినిపించాలేమో .. !   లేకుంటే ..

ఏమిటీ విపరీతం.. ఎందుకీ దుస్థితి.. ఎవరు కారకులు...??

           గడిచిన వారం రోజులలో రెండు తెలుగు రాష్ట్రాల దీనస్థితి చూస్తుంటే..  నాకు చిన్నప్పుడెప్పుడో చూసిన "ఆదిత్య 369" చిత్రం గుర్తొస్తోంది.. కొద్ది రోజుల్లో మనం మర మనుషుల్లా.. వాతావరణం లోంచి వచ్చే వాయువులను తట్టుకోవడానికి మాస్క్ లు ధరించాలేమో..!

ఒక్కసారి ఆలోచించాల్సిన అవసరం  ప్రతి ఒక్కరికీ ఉంది.. ఇది నిజం.. మనం నిజం మాత్రమే మాట్లాడుకుందాం కాసేపు..

      నేను నేల మీద ఆంలెట్ వేశానేను మూడేళ్ల క్రితం అప్పుడు వడదెబ్బ మృతులు అతి తక్కువ నమోదయ్యాయ్.. అప్పుడు నమోదైన ఉష్ణోగ్రతలు 47- 48 వరకూ అత్యధికంగా, రామగుండం ని మించి భానుడు భగ్గుమన్నాడు..

        ఇప్పుడు గత రెండేళ్లలో కన్న ఉష్ణోగ్త్రతలు తక్కువే 43- 46 వరకే నమోదవుతున్నయ్.. కొండకచో 47 డిగ్రీలు.  అయినా  వృద్ధులు, పిల్లలు పిట్టల్లా నేలరాలుతున్నరు.. పండుటాకుల పరిస్థితి శోచనీయం. కనీసం గంటకు ఒకరుగా వడదెబ్బకు మృతి చెందుతుంటే ఒక జర్నలిస్టుగా నిశ్చేష్టుణ్ణయ్యా.. మృతిచెందిన వారిలో పదొకొండు రోజుల పసికందు నుంచి 75 ఏళ్ల వృద్ధుడి వరకూ ఉన్నారు.. ఆంధ్రా, తెలంగాణా వారితో పాటు అర్జెంటీనా యాత్రికుడు ఉన్నాడు..

ఒళ్ళంతా ఒకటే మంట.. ! ఉక్కపోత.. వరంగల్ లాంటి చోట ఆక్సిజన్ కూడా అందలేదని ఫ్రెండ్స్ ద్వారా తెలిసింది..

మరి ఇంతమంది మృతి చెందడానికి ఎవరు కారణం..? ఈ పరిస్థితికి కారణం ఎవ్వరు..?
మనమే..! అని నాకనిపించింది. మనం వాడుతున్న ఫ్రిజ్ లు, ఏసిలు వగైరాలు ముఖ్యభూమిక పోషిస్తుంటే.. అడ్డగోలుగా చెట్లు నరకడం మరో దారుణం. మనల్ని ఇప్పుడు ఏ కేంద్ర రాష్ట్ర ప్రభుత్వాలు కాపాడలేవు..

  "పచ్చని చెట్టు మాత్రమే మనల్ని కాపాడ గలిగే ఏకైక అస్త్రం.".



ఇవి పాటిస్తే బావుండు...



 1. ప్రతి మనిషి కనీసం రెండు చెట్లను అధికారికంగా దత్తత తీసుకోవాలి..
 2. ఇళ్ళలో ఎవరైన పుట్టిన వెంటనే రెండు చెట్లు వారి పేరు మీద నాటాలి.
3. అవసరార్ధం ప్రభుత్వ సర్వెంట్లు చెట్టు నరకాల్సి వస్తే వారు వెంటనే పది చెట్లు నాటేలా చర్యలు తీసుకోవాలి.
4. ఇళ్ళలో జరిగే ప్రతి కార్యక్రమానికి గుర్తుగా ఒక చెట్టు నాటాలి.
5. పెద్ద కార్యక్రమాలకు అంతే పెళ్ళి వంటి కార్యక్రమాలలో ప్లాస్టిక్ డబ్బాలు..స్టీలు బొచ్చ్చెలు బదులుగా ఒక మొక్కను పంపిణీ చెయ్యాలి..

ఇలా వీలైనన్ని చెట్లు నాటడం చేసేందుకు ఇవే కాక,  మీకు వీలైన పద్దతులు ఎంచుకోవచ్చు..

పెరట్లో చెట్టు పెంచడం వల్ల భూగర్భ జలం అభివృద్ధి చెందే అవకాశం కూడా మెండుగా ఉంటుంది.. ఉదయం కాలం ఆక్సిజన్ ఇస్తుంది.  చక్కని నీడతో పాటు.. చల్లని గాలిని ఇస్తుంది..
                              
                             - మీ కరణం, 26.05.2015

అందాల గులాబిని

//అందాల గులాబిని //
                             - కరణం కళ్యాణ్ కృష్ణ కుమార్
                                             ౦౫.౦౫.౨౦౧౫
                                             05.05.2015

అందమా..?
అంటే..?
నాకన్నా ఎవరిదిరా అందం..?

అందాల పోటీల్లో ఆరబోయటమా అందం..
అరగుడ్డలేసుకుని చిందులేయడమా అందం..
అడ్డగోలుగా మేకప్పేసుకుని కప్పు లేపేయడమా అందం..

ఏదిరా.. ?           

అందమెక్కడ.?
 నాకన్నా అందమా వారిది??

నీకు ఒళ్ళు బలిసి విసిరిన..
 మీ అమ్మ రొమ్ము  పాలు
ఆసిడ్ గా మారి నన్ను హత్తుకున్నాయిరా,,

నీకు మదమెక్కి విసిరిన..
 నీయక్క పెట్టిన అన్నం ముద్ద
ఆమ్లమై నన్ను ముద్దాడిందిరా..!

నీ కొవ్వుతో విసిరెసిన..
నీ చదులమ్మల సిరా ..
అశ్రువై  నన్ను చేరిందిరా..!
 

కానీ..
నువ్వు మాత్రం  నన్ను తాకలేదు..       
నీ నీడ  కూడా నన్ను చేరుకోలేదు..
నీ జాడకి కూడా ఆ ధైర్యం లేదు..
అసలు నీలాంటి వాడు ఎప్పుడు గెలవడురా..!

గెలిచింది నేనే..! అందాల గులాబిని నేనే..!

దొడ్లుకడిగే యాసిడ్ కన్నా  నీచమైనదిరా నీ జన్మ..!
కనిపెంచిన ఆడదానికి తలవంపురా నీ జన్మ..!
మనిషిగా పుట్టిన మహిషి  నీవు..
మమతానురాగాలు తెలీని మృగం నీవు.
శతాబ్దాలు గడుస్తున్న మారని జాతి బలుపు కు రూపం నీవు..
కామంతో మూసుకున్న గుడ్డి జన్మరా నీది..!

ఏది రా అందం...ఏదిరా చందం..??
మనిషిని మనిషిగా ప్రేమించడంలో ఉందది,
మనిషిని మనిషిగా చూడటంలో ఉందది,
మనిషి మనిషిగా బ్రతకటంలో ఉందది..,
అదిరా అందం.. అదిరా  సోయగం

నిన్ను  తిరగానిస్తున్నానంటే..ఆ అందం నాలో ఉంది
నిన్ను బ్రతకనిచ్చానంటే,.. ఆ అందం నాలో దాగుంది
నిన్ను క్షమించటంలోనే .. ఆ అందం నిబిడి ఉంది
అర్ధమైఁదా.. అందం నాలో మాత్రమే ఉందని....!

నా ఒళ్ళంతా అందముంది..
నా మనసంతా సౌందర్యముంది
అది అంత, ఇంత కాదురా..!
నా సొగసు నీవందుకోలేనంత...
 ఆ నా సోయగం ఎవరెస్ట్ అంత.
నా ముందు నీ బ్రతుకెంత..?

----------------------------------------------------